Oibligge in ä Erziehungsstell
Hallo liewwe Laid, jedzd bin ich hier,
ich bin ään so genannde Erziehungsstellepionier
Funn Anfang a debai in all denne Joor
Unn was ich erzähl dess iss wirklich woor
Carpe diem, nutze den Taach,
spitzt aier Oore und heerd was ich saach
Wie dess ganze agfange hodd, dess habd derr schunn gheerd,
dess hodd de Herr Bucher aich vorhin erklärd
Die Devise war Geld spaare uff Deiwel kumm raus
Kinner in Erziehungsstelle - dess kam debei raus
Was Naies zu mache midd viel Fandasie
Do tauchen viel Frooche uff wie zum Beispiel a die:
Was issen jedzd annerschd bei're Erziehungsstell
Die Antwort is äfach, die sinn professionell
Ä Konzebd wärd dann gschriwwe, gut unn geschwind,
so wie unser Leid beim LuZiE hald sind
Konzebd schää unn guud jedzd brauch merr noch Laid
Ich hab mich gemeld unn habs nedd bereid
Moi Fraa unn ich mir hawwn uns gedacht,
dess krigge merr hie, dess wäär doch gelachd
Mir hawwn Platz im Herz, mirr hawwn Platz im Haus
Dess känne merr mache, dess reichd doch wohl aus
Doch noch ä paar Woche, do hammer kabierd,
dass dess ganz so ääfach wohl nedd funktioniert
Bai aich isses bleed, ich will wieder zurigg
Dess war nur vorübergehnd, ach Gott was ferr Gligg
Kännschd mool de Tisch degge, hab grad kää Zeid
Komm hobb helf merr mool - unn mach merr ä Fraid
Was ich soll helfe ich bin doch ned dumm
Bai aich do mach ich kään Finger krumm
Dess gsaade dess vergesse merr am beschde ganz schnell
Denn mir als Erziehungsstell sinn jo professionell
My home is my castle dess war e mool so
Jedzd wohnen jo a noch zwee annere do
Was issen jedzd annerschd erzeehl ä mool Klaus
Ja wenn er dess wolld, dann pack ich mool aus
Dess Moddo dess heessd jezd: Allzeit bereit
Rund um die Uhr, ferr uns bleibd kää Zeid
Ob Zääbuddze, Schuhbinne, Hausuffgabe nedd debei
De Deifel der steckt wie so oft im Detail
Verrissne Klamodde, die Hosse sinn nass
In die Wohnung midd Schuh direggd funn de Gass
Erzählen derr Stories.unn nedd bloss fumm Pferd
Die gewwn derr dess Gfühl, du siehschd alles verkehrd
Sache verschnipple dess machd denne Spass
Unn manchmool do fehld a noch Geld in de Kass
Der ständische Kampf um alltägliche Dinge,
die duun mich manchmool zur Verzweiflung bringe
Dess sinn awwer Sache, die keehren dezu
Unn owens do hammer dann a noch kää Ruh
Unser Liewesleewe iss ball gänzlich gestriche,
ääns funn de Kinner liegt immer dezwische
Unn wie kriegd derr dess gebagge in de Erziehungsstell?
So wie merr hald sinn, ganz professionell
2 eigene Kinner gabs a noch, so ganz newwebei,
dess war ganz schää schwierisch, mirr hawwn jo nie frei
Unser eigene Kids hawwens nedd immer leichd
Doch sie lernen ferrs Leewe, die sinn jedzd geeichd
Z.B. der Lehrer funn unserm Soon meld zurigg:
Der Paul ist für die Klasse ein ganz großes Glück!
Er hat enorme soziale Kompetenzen
Nur sollte er nicht so oft die Schule schwänzen
Viele funn aich, die werren jedzd denge,
wie kann merr bloos 10 Joor funn soim Leewe verschenge!
Was dreibd'den die a, bei all denne Krise
In Fässer ohne Boode ihr Herzblut vergieße?
Vielleicht duun die jo ann dem Geld sich berausche,
der wo so dengd, der kann gern ä mool dausche!
Die Kinner hawwn ä Rechd uff ä gsundes Leewe,
Dodenoch duud doch ään jeder funn uns streewe!
Moi Fraa unn ich mir hawwn beschlosse,
so Kinner bei uns noizulosse
Denne Kinner helfe ihr Ruggsäggel zu traache
An guude wie an schlechde Taache
Ihne zuheere, se ernstnemme, ihne vertraue
Unn ihne immer wieder Brigge baue
Schridd ferr Schridd känne so die Kinner geneese
Unn langsam verschaffe, was frier mool geweese
Unn midd denne Krise iss wie middem Tunnel
Wo ma noifaad werds dungel, woma rausfaad werds hell!
Bei aller Liebe, ma brauchd a Dischdannz
Unn wann do nedd uffbaschd verlierschd die Balance
Unn dass dess nedd bassiert bei uns ganz so schnell
Do hammer Beradung, Supervision - ganz professionell
Unn wann dann nooch Joore soon junge Mensch geht
Unn dann ganz allä uff eigne Fies stehd
Soi Leewe meischderd unn ab unn zu lachd,
dann wisse merr - dess hammer guud gemachd!
Sai derr naigierisch worre, wold derrs a waage?
Dann lossd aich funn mir zum Schluß noch ääns saache
Habd Muud unn machd mit unn lossd aich druff oi
Die Kinner werns aich dange, wann a nedd glai
Sich oilosse - drableiwwe - die Balle flach halde
Dann kann dess gelinge - wann a midd paar Falde
Getreu nach dem Moddo - S'iss alles im Fluss
Jedzd hawwich genuuch gred, jedzd mach ich mool Schluß
Tragd die Idee weider funn de Erziehungsstell -
Awwer duud merr ään Gfalle - bleibd professionell
Februar 2006 Klaus Geis,
(Wir danken herzlich für diesen gigantischen Fachvortrag)